Машаттөбе – ортағасырлық қоныс. Түлкібас ауданы Машат өзенінің сол жағалауында орналасқан. 1981 жылы бұрынғы Шымкент педагогикалық институты археологиялық тобы (жетекшісі А.Н. Подушкин) зерттеген. Қазіргі орны табаны 50х80 м, үстіңгі қабаты 30х50 м, биіктігі 4 м төбешік. Оңтүстіктен солтүстікке қарай созыла жатыр. Табылған қыш ыдыстар құмыра, кіші хұм, тостаған, көзе, т.б. заттарға қарағанда тұрғындар қалашықты 6–10 ғасырларда мекен еткен. Олар егін егіп, мал өсірумен айналысқан.